端記茶樓

Open Now

Now Closed

上咗大帽山川龍端記飲茶🫖，好彩有車，但司機搞錯咗川龍街同川龍😅，上到大帽山半路右轉➡️入川龍村，入村路好窄，考司機技術，有時見到對頭車仲要倒後。泊咗車後就見到村屋，上條好窄既樓梯搵位，點知上層都全滿，等咗一陣先有枱。點心同沖茶都要自助。點心🥧一定要樓下攞點心🥧，但茶就每層都有得自助沖，我飲普洱茶。點心🥧攞咗蝦餃、燒賣、雞扎、鳳爪、排骨、叉燒包、咖喱豬肚、鮮竹卷、牛肉、雞球大包、馬拉糕。鮮竹卷同炸雲吞好食，炸雲吞好脆。淥菜要搵地下阿姐淥，可惜西洋菜賣哂只有油墨菜就叫咗一碟。好多人食茶粿同山水豆腐花，但我想攞既時候已賣哂。埋單就叫侍應數點心籠同碟，所以冇人會清枱除咗埋單嗰一刻。最後都係每人$84.5，食到好飽。食完行咗附近睇埋西洋菜田先走。