金蘭花泰國菜館

Open Now

Now Closed

每當想食好嘢，都會諗起九龍城金蘭花。今日細女生日，阿女都自己開口話要去九龍城金蘭花。 我哋先嚟一隻泰式海南雞, 雞肉嫩滑有雞味，但係又去晒骨好食又方便。之前次次嚟都會叫佢嘅咖喱蟹, 次次都食到舔舔脷, 今日專登試吓平時未叫過，但係又好想試吓嘅「泰式鯽魚沙律」，上菜時賣相已經好吸引, 食落又真係好好味，師傅手工精細，先將魚肉起片炸，新鮮嫩滑，再將魚骨炸到脆香，再淋上一個極有泰式風味嘅醬汁，整個餸就變得別具吸引力。佢哋嘅沙嗲真係冇得輸，有佢哋自己嘅獨特腌料方法，啲沙嗲雞翼好香口好惹味，再嚟多一客我同阿女嘅至愛，泰式蝦餅，呢個幾乎係我哋次次嚟金蘭花必點嘅餸，每次都一樣彈牙、鮮味、又厚又大件，好食又抵食。再加多一個炒芥蘭同冬陰功湯。我哋今餐好完美，最緊要乖女滿意，金蘭花水準穩定，好食之餘，又大件夾抵食，值得推介！