暌記潮州飯店 (Closed)

潮州打冷今日第一次寫食評，當然要揀番間屋企附近嘅好嘢食。呢間暌記開咗響新蒲崗都好多年，雖然響垃圾房隔離，但好多時夜晚都座無虛席。咁受歡迎當然有佢嘅原因啦，所以今日同小學同學敘舊，就選擇左黎你度，貪佢夠平又好食！我哋一坐低，就叫姐姐來介紹有咩好嘢食，姐姐話椒鹽鮮魷，胡椒豬肚湯，椒鹽豆腐，蠔仔粥都好多人點！ 先講講蠔仔粥，我哋七個人點左個大嘅蠔粥都好夠分，蠔粥好足料，豪仔肉同瘦肉嘅比例差唔多有一比一，同埋粥底都好杰身，唔會食粥食到好似飲水咁，而且啲米煮得唔會太林，咬落有口感，個個都話正！ 再來椒鹽豆腐，豆腐炸得金黃，有落外面硬硬地，但入面好軟，而且味道鹹鹹地，上面仲有啲炸蒜，非常惹味！ 呢個八珍煲都好唔錯，朋友話呢個好抵食，估唔到入面有大蝦，粉腸，豬潤，豆腐，呢煲野真係好足料，而味道就好似平時食豆腐火腩煲嘅醬一樣，好正！