金柚泰國餐廳 (Closed)

大角咀近年食肆林立，好多新嘅餐廳都喺大角咀落戶。餐廳種類好多，有中、有西、有日本野、有泰國嘢、有越南野、有小食店、火鍋店、甜品店等等，有咁多餐廳，競爭難免變得激烈；然而，經得起競爭，能夠留低嘅餐廳自然有返咁上下工架。幾年前已經嚟過金柚，當時金柚的店面非常細；今日黎到，發現金柚已經搬左過隔離一個較為寬闊嘅舖位。我哋一行五個人來到金柚，萬幸地佔用到佢最後一張六人枱，唔使等位！打開餐牌，感覺價錢比普遍的泰國餐廳便宜；加上各位食友都飢腸轆轆，於是就放肆地叫左頗多的食物。最先出現嘅竟然係炒通菜，咪睇佢細細碟，其實份量一啲都唔少。通菜乾而爽，顏色唔算絕頂翠綠，但惹味又夠鑊氣，好食泰式炒金邊粉唔會炒得太過乾身，配料豐富，啖啖都食到紅蝦米、豆腐乾、酸蘿蔔粒、芽菜、雞肉等等嘅材料，撈埋旁邊嘅花生碎一齊，口感非常豐富。今晚嘅主角出場 - 咖喱軟殼蟹。我好鍾意呢種加左好多蛋入去嘅咖哩汁，香甜唔太辣；酥炸過後嘅軟殼蟹充分咁吸收左蛋香滿滿的咖喱汁，真係食到停唔到口。食晒啲軟殻蟹之後，我哋都冇浪費到啲咖哩汁。我哋除咗厚厚咁淋d汁上蒜蓉包度食之外，仲要左幾碗白飯黎撈咖喱汁。蠔餅係我無論食泰國嘢定係潮州嘢都必叫嘅食物