至尊重慶雞煲 (堅拿道西) (Closed)

講平靚正嘅雞煲我會揀至尊重慶雞煲 , 晚餐時段 7點鐘入座都係$158 一位仲要雞煲火鍋任食啤酒汽水任飲兩個鐘, 仲要免加一, 重點係個雞煲仲要好食 咁抵食嘅餐廳仲可係邊度搵! 雞煲有分大中小辣同BB辣, 因為雞煲會越煮越辣的, 我哋就揀咗個小辣級數。餐廳有自助飲品區之餘,亦設有一個自助小食區, 可以係雞煲嚟之前攞住啲小食嚟開吓胃先! 我就揀咗手拍青瓜同開胃蘿蔔嚟醒醒胃先! 兩款小食微微酸辣幾爽口開胃! 主角雞煲~ 打開煲蓋, 香味溢出, 未食個嗅覺已經感受到佢嘅惹味! 雞煲由花椒, 辣椒, 洋蔥再加其他多款香料等等組成, 再加埋佢哋個秘制醬汁, 辣辣哋,輕微甜甜哋, 帶點麻辣香, 個人幾鐘意, 雞肉好入味, 肉質夠新鮮嫰滑,相當惹味! 再跟住佢哋教嘅食雞3部曲(1)先食雞(2)放花膠,魷魚,牛柏葉 (3)加湯打邊爐。1部曲好味唔再講, 2部曲放埋花膠,魷魚落去吸晒啲雞煲醬汁, 好味到不得了! (我沒有放牛柏葉) 到第3部, 因為想keep 住個雞煲醬味, 我哋每次都只係加好少嘅湯水! 咁就可以每樣食物夠晒惹味! 打邊爐嘅款式有六十幾款咁多, 按自己嘅食量點就可以, 唔好浪費啊！