炎天丼 (Closed)

賣魚生丼飯嘅食肆開到周圍都係，相反天婦羅就較少見。一早已將此店收藏，今晚終於有機會一嘗。天婦羅可以賣到好貴，當然，唔係打工仔負擔到。哩間以實惠價錢，平均六，七十蚊一份就可以食到，絕對值得一試。哩到係無加一服務嫁，但店員都好好，一坐低就倒水。晚市每碗丼包一碗湯同沙律。沙律都係正常，加左麻醬。麵豉湯有菇,豆腐同豆卜粒，味道唔鹹，不錯。海老天丼，包括海老，菜心苗，南瓜，流心蛋，蓮藕，茄子。第一個驚喜係菜心苗好脆口，感覺好新奇，未試過菜都可以做到天婦羅，外而且粉漿好薄，調味恰當，菜心苗亦鮮甜。第二驚喜，係流心蛋，估唔到天婦羅蛋仲做到流心嘅效果。撈飯一流。第三驚喜係台上嘅自家甜豉油同味素，重口味嘅朋友可以任加。豉油同味素都唔鹹，適量加入可以令天婦羅丼更可口。每碗份量不大，男仔可能會唔飽。天婦羅同飯嘅份量啱啱好，令你每啖都有天婦羅送飯。