稻庭烏冬·鍋物日本餐廳 (Closed)

之前一直都聽人講呢間烏冬好食，今次去左elements終於有機會試！睇完戲差不多6點，都未有人等位，就走左入去食。佢有套餐，好似係食蟹，我揀左散點。點左鰻魚煎蛋卷，基乎係一落單即到，快係好，但一睇就知佢係整定，係凍既⋯⋯個樣OK，不過蛋唔係好鬆軟，鰻魚又唔香，都有D失望。點左美國頂級安格斯牛肉熱湯稻庭⋯⋯一見到真係哇一聲，呢碗野收我178蚊？好似平時食50蚊果碗生牛肉粉咁！我覺得個賣相真係一D都唔吸引，我唔明點解要178蚊⋯⋯都算一間中上級既日本餐廳，咁貴一碗烏冬，但個碗係崩既！我真係覺得間餐廳好無heart⋯⋯講番碗鳥冬，牛肉食唔出係美國頂級安格斯牛肉，烏冬又食唔出有幾彈牙⋯⋯又點左大蝦天婦羅，呢個係新鮮既，又熱又脆，不過脆漿厚左D，唔特別。催左兩次之後，終於黎埋另一個日本岩蠔肉燥熱湯稻庭。呢個賣相都差不多，唔太吸引，炸蠔有三隻，係新鮮炸起因為好熱，肉燥就得好少，幾乎見唔到⋯⋯炸蠔都唔算炸得老，但又係脆漿厚左D，肉燥好少，感覺好似得一樣餸咁，而且肉燥無乜味，呢個配搭唔太好。兩個人埋單要成600蚊，真心覺得唔抵囉，食物又唔特別，唔值呢個錢，咁既質素我去平價烏冬店都食到，無下次。