九如坊 (Closed)

公司同事都上晒廣州，得我一個鎮守大本營，所以食飯都係自己食。一個人行左去九如坊，印象中原來呢度開左間外表都都幾掂的餐廳，亦見佢午餐28蚊起，連飲品最貴都只係45蚊，平平地又一試無妨。坐樓下，一點來到都坐滿人，見外面的人亦不斷的入來，原來呢度有兩層。一個人幫襯少不免要搭檯，午餐有四款選擇，有28蚊同35蚊兩種，加飲品就多十蚊，叫了匈牙利牛肉。不設水杯，有支Bonaqua供應，此舉無疑是乾淨企理，但就不甚環保。先來菜絲沙律，加兩粒車厘茄，都算不錯；匈牙利牛肉飯碟頭上，肉汁濃濃的，夠汁又夠味道。牛肉煮得有咬口又唔太韌，水準比想像中好；有一盤飯後果任客自取，有蘋果、橙、蕉等，都幾好；熱咖啡即磨，幾濃郁，整体來說水準以上。侍應倒幾好服務，又好禮貌。埋單45蚊，不收加一，幾經濟抵食，難怪地方隔涉都有唔少人幫襯。可以一試的。