魔膳工房 (Changed Hand) New Restaurant

事隔一個月，沒食過西餐，心思思又想去食，咁啱，約個仔觀塘等我放工。放工後，觀塘人流都仲好多，想唔到位於廠廈內的餐廳都唔少食客，約到無啱，竟然隔離坐了同事，真開心！餐廳好大，闊落，餐桌排列整齊，服務殷勤，播放悠揚音樂，好舒服，唔想走！想要有更私人空間，仲有私房可以訂！私隱空間，令你食得更開懷，暢所欲言。我地叫左兩份Set Dinner, 餐湯系南瓜忌廉湯，雜菜湯，兩款湯唔夠熱，只得暖。雜菜稍為帶酸，餐包外脆內軟。西班牙火腿卡邦尼意粉，熱呼呼，香噴噴，意粉軟硬適中，香濃醬汁剛好掛滿、吸收每一條意粉，火腿烤得香脆，鹹香味濃，伴以意粉，啖啖美味在口中徘徊。西班牙海鮮燴飯，香濃熱飯，每粒米飯都吸收了海鮮鮮味，飯面上擺了數款海鮮，虎蝦、魷魚圈、青口。虎蝦有手掌咁大，煎炸得脆卜卜，蝦肉彈牙爽口，一口咬落蝦頭，蝦膏即時濺出，連蝦殻都食埋，鮮味十足。燴飯則鹹咗少少。中間位置，放有自助沙律，每位需另加$38/位，即可以任食。