勝面 (Closed)

今日朗豪坊行街，見到有兩間餐廳排晒隊，其中一間就係勝面，望一望餐牌，原來係台灣菜，價錢亦唔貴。從餐牌可以感受到餐廳對於多樣性嘅重視，例如麵條可以選擇關廟麵、新竹米粉、甚至刀削麵，選擇豐富，呢點係其他台式餐廳好少見。另外餐廳因應香港口味推出左無骨鹽水雞。我叫咗鮮熬豚骨豚白肉配新竹米粉，豬骨湯呈奶白色，每啖盡是醇濃豚骨香氣。新竹米粉雪白透明，而且浸係湯好耐都唔爛，豚白肉肉質厚實，肉味重。整體相當出色。女友叫咗涼拌手撕無骨鹽水雞配刀削麵，刀削麵煮得比出面較稔，湯底幾清淡健康。鹽水雞最令人印象深刻，肉質好嫩，帶有微微蒜香，份量亦多。滷肉飯用左珍珠米 ，另外肉燥同時混入瘦肉，所以唔會太膩，但肥肉比例較小，無左入口即化既口感。芝士肉鬆雞蛋手工手抓餅餅皮夠脆，肉鬆同蛋既味道較芝士突出。珍珠奶茶甜度啱啱好，珍珠口感彈牙，不過冇乜味道。呢杯白桃烏龍名叫烈日桃桃，茶包浸得愈耐愈好飲。如果大家嚟到旺角又唔想食咁貴，可以試吓呢間勝面，絕對令你喜出望外。