座銀

Open Now

Now Closed

星期六去到尖沙咀準備食飯，佢突然話轉場：「帶你食好嘢」❣️入座前可以坐喺店角等，店員先遞上餐牌俾我地睇。餐牌只有薄薄幾頁，食物不到十款，睇黎店舖對招牌雞白湯好有信心。佢話食過雞白湯麵同沾麵都好好食，幾經糾結之後我地一人揀一款。雞白湯拉麵($138)。好少食雞湯湯底，因為通常都係=雞粉湯。湯底出奇地唔咸，雞味濃郁，有啲creamy。泡沫口感同飲咖啡奶泡一樣，有種綿密幼滑嘅frothy感。我唔鍾意食炸牛蒡，乾身無味又熱氣，影完相就夾晒俾佢。佢叫我食一條試下，試完我就夾返一半俾自己😂😂脆脆地又唔會好乾身，有啲淡淡嘅甜味。雞沾麵($148)。沾麵嘅湯更加濃，但係雞味冇湯麵咁突出。佢堅持要我試下沾麵湯加薑蓉，提味之後啲湯汁更濃鮮味，又冇中式薑蓉嘅嗆喉感。佢比較鍾意沾麵。我覺得沾麵比較特別，但係對我太濃味，share食少少就夠。煙熏糖芯蛋($15)。佢鍾意煙熏嘅香味，我就覺得有啲苦。呢度行日式服務風格，店員全部好後生，服務殷勤，多次主動加茶。店舖雖然唔大，但係座位寬鬆，坐得舒服。廁所入面有即棄牙刷、綿花棒、lotion、漱口水、洗甲水等等。