Lúa (Closed)

好幸運坐到喺閣樓燈籠座位，諗起5年前喺越南會安見到嘅感覺，夜晚吹着涼風，非常舒服。最特別係呢度嘅扎肉、肉丸、春卷、辣椒油都係越南工場自家製造，無添加，真材實料，梗係要叫下相關嘅菜式。我哋試左自製牛扎肉串燒（可選辣或者不辣），小食自選拼盤，頂級爐烤羊肉串、潘切直送小墨魚春撈檬（小辣）。自製牛扎肉串燒（辣）一食落口已經食到好爽口彈牙，牛味濃，配埋少許嘅辣汁，好惹味。小食自選拼盤揀咗即叫即製手工粉包2件、柑桔汁雞翼、豬肉春卷，晶瑩剔透既粉包好足料 - 入面碎豬肉、木耳、蝦米mix埋一齊，口感豐富，粉皮好滑溜。雞翼炸得非常香脆，咬落去有肉汁，配埋酸酸地嘅柑桔汁解膩。豬肉春卷都係自家製，咬落去好鬆化，皮薄餡大。頂級爐烤羊肉串食落去完全冇羊臊味，外表焦黃油亮，獨特嘅醃製材料令羊肉串入口更香。潘切直送小墨魚春撈檬（小辣）我第一次見呢種配搭，即刻叫黎試試，細細隻嘅墨魚仔食落去好滑，配埋撈檬好清新，加咗少少放係枱面嘅辣醬，辣將辣味香濃，有少少香茅、蒜及蝦嘅香味，鍾意食辣嘢嘅朋友記得要試佢哋嘅辣醬。