鮮入圍煮 (Moved) New Location

係油尖區康體會上完瑜珈堂，同學相約去附近有間拎咗好多食肆獎狀嘅鮮入圍煮，係登打士廣場二樓。上到店內巳見人山人海，大排當格局，燈光照明，見有兩位師傅小心翼翼地切鮮牛肉同精心擺設食材，漁缸裡啲海鮮游嚟游去極生猛。當然要試主打之一濃厚原隻雞煲花膠湯。嘩！真材實料厚花膠加鮮雞熬成湯底，稠密濃郁帶有花膠香味，綿滑湯底富黏性，飲到停唔到口。羊肉薄片油花分佈均勻,少許羊羶味，係滾湯拖幾吓就可，入口油香豐腴。原隻帶子餃子餡內除肉外還有2隻小帶子，皮薄餡料鮮味。脆脘肉片，爽脆鮮甜。有這樣的新鮮食材，可見拿獎無數是實至名歸。