謝謝儂 (淘大商場) (Closed)

平時同男朋友諗唔到食咩就會去食上海野，之前食過謝謝儂嘅其他分店知道佢哋食物一向都有水準，今次就試咗佢哋九龍灣嘅分店。九龍灣分店比較大，位置都好寬，就算呢個敏感時期食大家枱與枱距離都枱得好開，安全感十足。每次黎都必食佢哋呢個系列，今次就叫咗食上海野必食嘅蟹粉小籠包。咬開一啖俾大家睇吓幾足料，食到淡淡蟹肉，皮夠薄，湯汁亦好juicy，推薦大家一定要試吓。上海四川野入邊我都好鍾意食酸菜魚，所以今次叫咗呢一個酸菜桂花魚。魚肉食落好滑嫩，亦都煮得入味，湯底夠酸，對我呢個食得辣之人來講就覺得未算太辣，但男朋友就覺得啱啱好，酸酸辣辣好送飯。仲配有好煙韌嘅薯粉，食完超級飽。食完濃味嘅嘢就叫咗一碟清淡啲嘅干貝賽螃蟹，蛋白炒得好滑唔會過熟，雖然係材料好簡單嘅菜式但好考廚師功夫。總括嚟講食上海野我都好推薦謝謝儂，價錢公道，食物質素有保證。