越男仔

Open Now

Now Closed

今日無煮飯，就在屋企附近食晚飯。呢度有間越男仔，又未食過，咁老公就話不如食吓。餐廳燈光淡黃，播放住越南歌，環境乾淨整齊，坐得舒服。餐牌選擇都幾多，老公發辦叫左佢鐘意食嘅燒雞，另外串燒拼盤同撈金邊粉。原隻太平燒雞：燒雞先原隻上枱，職員先倒酒，然後再點火。火燒得都幾勁，其他客人都有望，都幾吸引。燒左一陣熄左後，職員問我哋切唔切，唔切可比手套撕黎食，我哋揀切會方便D。燒雞熱辣辣，皮夠薄，咬落脆，肉嫩帶肉汁，醃得入味，隻雞又唔算多脂肪，好好味。秘製沙嗲串燒大拼盤：除左豬牛雞各兩串，另外仲有菠蘿。肉類燒得好香口，入口juicy，點埋秘製沙嗲醬就更加好食。而燒過菠蘿亦夠甜，好多汁，幾好。蒜蓉牛油雙蝦扎肉撈金邊粉：蝦大隻，食落帶鮮味，面層鋪滿牛油蒜蓉，兩款味道又夾又突出，另外蝦頭炸過，都幾多蝦膏喎，好夠味。扎肉亦有煎過，有香味。金邊粉較煙韌，米味香，裡面仲有生菜，爽口。整體撈埋甜酸汁一齊食，酸酸甜甜，又幾開胃。