一番街 (Closed)

住鰂魚涌嘅友人推薦過呢間小店，事實係好細好細嘅一間店，地理上較少人會經過嗰邊，門口較不起眼，所以就算經過都極可能會睇過龍。全店都只可容納三枱客人，好彩黎到得一枱客(可能對於老闆黎講唔係好彩)，我同男朋友都好快落咗單，之後就見到師傅好努力咁整壽司。我哋都點咗頗多款壽司，三文魚、蔥花吞拿魚蓉、海膽花之戀、毛蟹肉、鰻魚、腐皮、蟹子沙律、蟹棒等等。其中，最最最好食係左口魚裙邊，入口即溶，搭埋蔥花嘅香味，簡直一流！另外厚燒鰻魚同海膽花之戀都好難忘，喺口腔滿足嘅感覺簡直令我哋眼冒心心令我哋更加感嘆嘅係一間細鋪得一位師傅，但竟然味道不輸蝕大型餐廳，更莫論價錢真係十分親民，食到飽一飽埋單落樓都只係二百幾。咁可愛嘅小店真係去邊度搵！