花木日本料理 (Closed)

放兩個星期假，唔去旅行就要喺香港不停食食食，今次就試食一間位於尖沙咀天文台道叫花木嘅日本餐廳，個名改得好靚。入到去餐廳環境就如個名起得一樣咁靚，餐枱與餐枱之間距離闊落，用具整潔新淨，睇落都幾高級。唯一唔係咁好就係吧枱位置比較入，唔起眼。食物質素方面，今次主要食壽司，叫左兩份壽司拼盤（10本），最滿意一定係佢嘅海膽壽司，海膽新唔新鮮真係好重要，一舊唔新鮮嘅海膽，足以令你成晚個口食乜都臭，而花木嘅海膽壽司，食一舊絕對唔滿足，太鮮太好味！其他魚生壽司質素都偏高，特別係中拖羅，油脂豐富，仲要夠厚身，本身鍾意食拖羅嘅朋友不妨點個中拖羅刺身4切試下。花木 呢間餐廳價錢中上，但質素絕對值回票價，淨係個環境已經加曬分，食物仲要又新鮮又好食，值得一食👍🏻