金萬年酒家 (Closed)

今朝早又一支公，去咗黃埔呢間酒樓飲茶。呢間酒樓係某影視紅星有份投資嘅，地方不算太大，環境都尚算清幽啦！價錢都相當大眾化， 早晨孖寶都係$30，有蝦腸揀， 喺呢個時候有咁嘅價錢，算係咁啦！另外特價點心款式都十分多。今日我冇食孖寶，點咗兩款特價點心，一個懷舊鴨腳扎，一個鮮蝦菜苗餃。魚肚滑雞扎大家就聽得多啦，但係呢度嘅鴨腳扎就加咗一片魚肚落去，當堂名貴咗，嗰塊魚肚真係有用上湯餵過，鴨腳又十分惹味，有八角落去個醬汁，但醬汁油 唔會太濃，有一件芋頭，有一塊豬肉、蝦肉、冬菇及少量肥肉攪製成肉餡，味道好好。呢個我十分推介。鮮蝦菜苗餃，餃皮都尚薄，不太煙靭，餡料用上白菜同鮮蝦，味道中規中矩。食兩碟嘢， 都$53蚊，性價比好高。