鮨本

Open Now

Now Closed

識得食omakase一定係揀晏晝時段過嚟，價錢經濟又實惠。餐廳係由朋友介紹，佢特別推介玉子燒，反而唔係壽司，所以令我非常難忘，所以就決定品嚐呢一間餐廳。-一入到餐廳，餐廳內大約有20個位以內，感覺私隱度極高。而且侍應亦都非常主動幫忙，好熱情。師傅第一道俾我哋睇嘅係玉子燒，外型似足古早味蛋糕，非常可愛。$750嘅餐單裏面包含了兩個酒肴菜式，分別係生蠔及鮟鱇魚肝，魚肝質素非常高，香甜可口，比起我之前食過嘅苦澀味完全冇喎！-首個頭盤就係茶碗蒸，茶碗蒸上面嘅用料充足，特別鍾意佢嘅蟹柳，蛋亦都好滑身。鍾意食拖羅嘅朋友，一定唔可以錯過， 10款壽司裏面有兩款係拖羅，分別係野生大拖羅及中拖羅壽司。而我特別推介係赤中海老壽司，蝦身好厚，而且肉質亦都好實，每咬一啖蝦肉汁就會喺口中慢慢消逝，非常可口。-另外壽司有幾款亦都經過昆布醃製及用稻草燒過，味道更加豐富，係口中徘徊嘅時間更加耐，令到我需要飲幾啖茶先至品嚐下一道壽司。-最後玉子燒放置最後，可能師傅都覺得好似甜品，佢嘅質感非常似蛋糕，要做到咁多層次嘅玉子燒，一定好考師傅嘅功夫！最最最後有湯及甜品雪糕，雪糕我揀咗開心果雪糕，味道非常特別，清新可口！