初遇

Open Now

Now Closed

平時都好少去沙田，不過最近聽朋友介紹，呢度有間台式餐廳嘅下午茶好抵食，咁今日就特登搭車嚟試吓啦。一去到估唔到平日嘅下午三點都咁多客人，不過好彩有位，佢嘅位置差唔多全部都係卡位非常好坐。朋友話呢度最出名嘅係臭臭鍋，咁就一於叫一個嚟試吓啦，不過因為唔食臭豆腐嘅關係，所以就叫咗一個麻辣海鮮鍋。一上台估唔到有咁多海鮮，而且食落都好辣，海鮮非常新鮮。我覺得最抵讚嘅就係蝦，因為夠晒大隻之餘，而且肉質好彈牙。佢嘅蜆都好大隻同埋好多，一食就知道係新鮮嘅食材。另外我哋仲嗌咗個拼盤，拼盤用九宮格嘅形式上，非常適合打卡。我覺得最大讚嘅就係個台式香腸同埋牛肚，除咗份量好多之外，味道都一流。飲品方面，呢杯香芋珍珠奶茶都好出色，飲落唔會太甜，但係芋頭味好夠，珍珠都有少少甜同奶茶好夾。呢間餐廳又平又抵食，唔怪得咁多人介紹啦。就算唔係住喺沙田都應該特登嚟試吓。