御和亭日本料理

Open Now

Now Closed

今日夜晚食左個粉，唔係好夠飽，口痕想食下串燒，於是唯有落樓下間居酒屋食啦。御和亭其實都食過好多次，亦介紹過唔少朋友去試，大家都係一致好評，大讚超值，性價比高嘅小店。不過朋友多數黎食壽司刺身，其實呢店爐端燒都做得好好，所以今次決定寫寫佢。今日叫左4樣串燒，分別係鹽燒牛舌、塩燒鮮雞睥肉串、汁燒牛肋骨肉同燒雞腎。先講鹽燒牛舌，呢個並非一般日式餐廳個d來貨牛舌，呢度嘅牛舌一d都唔硬，非常爽口，咬落軟軟口感，成口都沖滿油香，配合黃芥末醬食，微酸令牛味更平衡。再講塩燒鮮雞睥肉串，呢個係我每次黎都必食嘅，真係用新鮮雞脾肉整，遲黎有試過賣晒架。雞肉嫩滑絕不乾身，咬落juicy，配合旁邊小青檸嘅汁，令雞肉鮮味更突出，一試保證難忘。而且佢個蔥燒得好腍，唔會有渣，出面無幾多間肯咁慢火去燒。汁燒牛肋骨肉牛油味好重，一啖食落去已經成口油，好適合好牛人士。牛質亦算軟滑，唯獨燒得有少少未熟透，如果怕生嘅，記得同師傅講燒熟dd。燒雞腎就一般水平，細細粒都易咬，但唔算太有驚喜。下次去開御和亭，不彷試下串燒，真係做得唔錯。