花貝日本料理 (Closed)

近年新開嘅Omakase越來越多，今日就同朋友試一次之前bookmark咗一段時間嘅花貝日本料理。一踏出升降機，就係餐廳寬敞嘅等候區，以日式庭園設計，感覺舒適親切。晚巿餐牌原來都有四款咁多，點咗一客「Kaede楓」，均有刺身及熟食。先來一式三款前菜，梅貝、水雲及螢光魷魚，當中以酸甜嘅水雲最為開胃。接着係五款不同刺身，包括白蝦、拖羅、劍魚腩、鰤魚及赤貝。最喜歡劍魚腩魚油香豐腴，赤貝亦鮮甜爽口。然後有吸引眼球嘅雪燕桃膠鯖魚。如以鯖魚作食材，以前試過手握壽司、太卷、箱壽司等，但配合雪燕桃膠都係第一次品嚐。再來一份野菌帆立貝。之後就係松葉蟹天婦羅，炸粉漿厚度適中，咬落香脆但唔會蓋過食材本身味道。無論係鮮甜嘅松葉蟹，還是番薯、秋葵都十分不錯。Highlight可以話係呢客魚子醬三文魚䰵海膽。三種唔同嘅食材配上舍利，味道層次豐富，每款食材都有獨特嘅鮮味及鹹香，加上微酸嘅舍利，很讚。最後係蟹噌醬湯及甜點綠茶奶凍及赤肉蜜瓜，喂呢一餐畫上圓滿嘅句號。