一浩 (Closed)

今日我們去咗屯門黃金海岸商場行街，見到有間新開嘅日本餐廳「一浩」，店內嘅環境裝修非常高雅，座位相當寬敞舒適，有一個好大嘅開放式壽司吧同另一個獨立嘅鐵板燒吧，可以畀人客選擇坐喺吧檯度睇著師傅即燒即製畀我們食，所以我們就決定喺度食晚飯！因為當時我們諗唔到想食咩，所以叫咗鐵板燒師傅幫我們精心安排幾款佢嘅拿手招牌美食！日式牛油炒什菌拼牡丹蝦天婦羅係即叫即炸，相當新鮮熱辣，炸粉唔會好厚身，蝦肉嘅肉質超爽甜彈牙！香煎頂級鵝肝煎得薄薄一層金黃香脆嘅表面，可以食得出師傅控制火候嘅功夫相當了得，入面極之香滑軟綿綿同入口即溶，而且完全唔油膩同無「騷」嘅味道，令到平日唔係太鍾意食鵝肝嘅我們，都覺得超級好味同一試難忘！係本人極力推介！一口和牛煎到五成熟，每一口亦都係薄薄煎香一層，可以鎖著肉汁，肉質超嫩滑，必定要一試！至於壽司方面，師傅就特意為我們做咗一幅用多款色彩繽紛嘅新鮮壽司堆砌而成嘅壽司畫，賣相非常精緻吸引，靚到唔係好捨得食！另設有酒吧區，有多款特色飲品可供人客選擇！總括：喺呢度食飯，望出店外有一個景色怡人嘅無敵大海景，有美食同美景，真係人生一大享受！有時間嘅話，我必定會再嚟享受人生！