我愛慢煮 (普慶坊) (Closed)

今日同朋友黎左呢間好有情調嘅餐廳，位於上環，餐廳內設計幾特別，又有紅磚做背景，燈光昏暗，打卡一流。我地叫左份安格斯特級牛扒，蜜糖燒春雞配鵝肝，海鮮濃汁配藍青口，咸蛋黃單骨雞翼同炸蕃薯條。份牛扒約5成熟，鎖得住啲肉汁，唔會過老，配埋佢嘅醬汁，口感豐富，味道都唔錯。另外份燒春雞個人覺得比較差，佢係慢煮嘅方式去處理，味道雖然唔錯但肉質太生，觀感上冇咁好，慢煮時間可以再捉摸得好啲。另外加配左鵝肝，但比較乾身，亦冇汁去點綴下，所以都係爭少少。反而份藍青口有驚喜，大大份，而且每隻青口都唔細，湯汁同青口都好夾，食晒啲肉都想繼續飲埋啲汁。青口肉幾彈口，值得一試。最後單骨雞翼同炸蕃薯都唔錯，單骨雞翼炸得夠脆，而且蛋黃醬都好夠，仲有少少辣，有咁上下水準。份炸蕃薯就炸得老左少少，但味道同口感都好好外脆內軟，食到蕃薯嘅甜味。整體上，食物同環境都唔錯，值得推介。