Thirty First of May (Closed)

同朋友喺荃灣廣場行完街，走咗去附近嘅大壩街搵地方食晚飯。見到呢間《Thirty First of May》門面咁靚，決定一試。餐廳裝修甚有格調，座位舒服，天花仲裝有月亮吊燈，十分有情調。餐牌印刷精美，圖文並茂，相當清晰。意大利巴馬火腿配蜜瓜 - 以鹹香的巴馬火腿加上香甜蜜瓜，再配以上新鮮爽脆沙律菜及酸酸甜甜嘅黑醋汁，清新又好食。黑松露野菌忌廉湯 - 餐包口感香脆，忌廉湯黑松露及野菌味香濃，飲到有好多打碎嘅爽口野菌蓉，香滑得嚟有質感。意式蕃茄汁大蝦扁意粉 - 扁意粉滑溜煙韌，蝦肉新鮮大隻爽口彈牙，配以酸甜中帶點鹹味嘅蕃茄汁，滋味好食。法式紅酒燴雞 - 雞肉燴得入味軟身得嚟帶少少咬口，蘆筍、粟米仔及西蘭花均十分爽口，配以香滑薯蓉，健康又豐富。最後歎返杯香滑濃郁嘅熱即磨咖啡為呢餐作結。