碌冧法式越南料理 (Closed)

約了老友食飯，本來是想去愉景新城今日才開張的翔龍小籠包，可是六點半左右，已拉晒長龍。老友一向不喜歡等位，就轉移目標。不過，呢頭又有什麼好吃呢? 我也真的搞不懂。隨便走入了碌冧，屬鴻星集團旗下的食肆，做越南菜的。不過，個人認為這餐廳是愈做愈Hea，現在甚至做埋任食。一向對任食無興趣，都係散叫，點晒廚師推介，段估會隱陣，可惜事與願違。先說頭一味，牛肉紙火鍋，只有幾片薄薄的牛肉，肉質不軟，湯底是甜得過份，像下了很多糖咁樣，唔掂。明爐蒸魚好搞笑，爐就standard size，條魚就鬼咁細條，真係好難搵的，哈哈~ 魚肉不會嚡口，卻一點味道都沒有，香料又係廢既，個汁亦唔得，好失望的。最後是椰青焗雞扒飯，椰青飯和雞扒是分開上的，看起來都像樣。不過，米飯唔夠鬆軟，全無椰汁的香，雞扒就是快餐店的貨色，我吃了少許得停手。兩條友食，埋單$300，吃到咁樣質素的食物，自然唔會開心。