Thai Basil (Moved) New Location

之前山長山遠黎到太古廣場，諗住係樓上食漢堡包，但去到又揀唔落手。最尾好肚餓既無諗咁多，見到Thai Basil都幾多人，望一眼menu就立即入左黎坐低。坐低我地光速揀野食，餐廳上菜都好快，如果唔係我地隻餓鬼一定反檯。軟殼蟹米紙卷最先黎到嘅就係呢款米紙卷，平時我食既米紙卷擺盤都比較單調，幾碌野好孤單光脫脫咁棟係碟度，對比起，呢間餐廳喺擺盤方面都有花啲心思。米紙皮唔會軟爛，帶啲煙韌又唔痴牙唔難𡁻。軟殼蟹微溫唔油膩，少少鹹卜卜脆。卷內蔬菜同牛油果醬平衡番，令成個卷變得清爽。淋係旁邊嘅芫茜油都唔會搶味，唔食芫茜嘅人應該唔多覺。呢個米紙卷佢配左一碟醬，係沙律醬加蝦油（不過蝦油又係無乜存在感），甜甜酸酸，增加左米紙卷味道嘅層次感。生菜包呢款生菜包有豬肉同鴨肉，肉碎炒得乾身，鴨肉都無膻味。加埋啲香料、芫茜、羅勒葉，真係好香口！生菜同埋醃洋蔥balance番重口味既肉碎，三兩啖就輕鬆KO成碟。不過事實無咁輕鬆，因為呢碟對我黎講有啲辣，食完呢個，食乜都係辣嘅。Pad Thai廚師將金邊粉炒得條條分明，同時又唔會滿口油，或者變左濕炒咁。亦都唔會好似有啲香港泰菜咁，落勁多茄汁當羅望子汁，最尾入口飲茄汁咁款。