創味坊 (Closed)

今日同朋友去長沙灣買野，行到又熱又肚餓，經過一間餐廳見到入面裝修好特別，就一於入去試下。一入門口員工就好熱情咁問我地幾多位，坐低後馬上就比左杯水我地，可能佢已經見到我地好熱!!一睇餐牌就發現原來呢到野食種類好多，搞到我都唔知揀咩好，係呢個時間我發配左原本佢地有一部電視係播緊佢地餐廳既食物短片，強烈推介一個芝士蛋包飯。但係呢一個時間我朋友又話比我知餐牌上有扒食，因為我係一個好鐘意食牛既人所以又比佢地既西冷肉眼扒深沐吸引住，係天人交戰下身為牛魔王既我始終放棄左芝士蛋包飯呢個選擇!意外地餐廳上菜好快，唔使我地咁肚餓咁等，湯我揀左紅湯，可以睇到佢地材料非常多，一飲落去發現湯既辣度岩岩好，因為之前試過太多餐廳既紅湯都無咩味同唔辣既!好快咁個牛扒就上埋黎，今次我揀左5成熟，因為唔同既餐廳都有唔同既標準，但今次我覺得同我想像中差唔多，牛肉唔會太熟，黑椒汁都好濃味!最後餐飲我點左佢地既奶茶紅豆冰，發現奶茶味非常濃郁而且仲有啖啖紅豆配合非常特別!呢次食得非常滿足，所以我決定下次再會去試埋個芝士蛋包飯!!