Casa Pennington (Closed)

環境衛生各4：高級餐廳格調，偏暗，又有柔和英文歌音樂，周圍非常乾淨，所以畀四分。服務5分：侍應生非常殷勤，每次食完都主動換碟換刀叉，非常整潔，滿分。味道5分：1)     免費送嘅橄欖有黑色同綠色，兩種顏色一樣都係冇咗粒核，非常之細心，非常簡單就可以食到，唔使理粒核，橄欖油浸住感覺非常之健康。2)     生蠔睇住佢即叫即開，冇花假，每隻都好肥好鮮好甜，買一送一果下先抵。3)     燒虎蝦沙律有兩隻大大嘅虎蝦，用香草醬汁一齊燒過之後非常之香，虎蝦多肉之餘都算彈牙，配上幾款不同嘅新鮮沙律菜，食落非常配合。4)     西班牙黑毛豬上枱時，塊黑毛豬有成隻手板咁大，非常之厚身，睇落應該唔止成吋厚，但食落非常之煙韌，好有肉汁，同好香嘅豬扒味，配埋啲雜菜，包括有意大利青瓜，法邊豆，蕃茄，細薯仔，粟米仔同原條紅蘿蔔，又好食又好睇，所以畀五分。5)     甜品梨撻好大份，用左兩隻梨開邊烤出，個酥皮超脆，最正就係Ｄ梨好夠熱，又甜又爽。抵食4分：高級西式餐廳主動提供免費水或暖水，值得加分，部份生蠔買一送一，塊黑毛豬真真物有所值，所以畀四分。