好客緣煲仔粥 (Closed)

今日再一次尋覓堂記不果，無拉拉又休息。一場來到，咁就繼續係附近搵食啦，行左好多間，都係雞煲，串燒啊，見到尼間好似都有腸粉喔，一于試下。 鮮蝦腸哇，d皮真係晶瑩剔透，吹彈可破，內餡呼之欲出。蝦很新鮮，有蝦味，好似新鮮蝦咁啊，須知好多地方蝦味都無。豉油甜甜地，拌上腸粉，滋味無比。可惜只有三條，食完即刻想encore。 煲仔魚腩粥上來重滾加，有3/4舊魚腩，不過比起蝦新鮮程度就遜色不少。粥底濃稠，但絕不是很多粥店用味精溝出來嘅artificial味道，事實證明當晚都沒有口渴，應該真係無或者好少味精。粥混合薑絲，蔥，特別的是粥裡還有脆脆的菜脯，和絲絲瑤柱，使每一口都有豐富的驚喜味道。 蘿蔔糕係要求下，都可以選擇蒸。其他地方蒸蘿蔔糕一般都好軟爛，這裡卻仍然堅挺，雙口，不會一pia pia。有粒粒完整嘅蘿蔔，臘腸粒，蝦米，好好味啊。可惜當晚太肚餓，只影左開頭嘅粥，後面就只顧住自己食無俾相機食。雖然想搵嘅係另一間不果，但選擇左尼間都真係好驚喜。有時搵食唔使刻意，保持開心嘅心情，食咩都好啦。