金源燒腊茶餐廳

Open Now

Now Closed

Item: 金源燒腊茶餐廳
Author: 奧志雷

5 Reviews

Taste

Decor

Service

Hygiene

Value

140

Hung Hom

Below $50

Hong Kong Style Chinese BBQ Tea Restaurant

奧志雷

Level4

2.1K

Read full review

兜左兩個圈身水身汗唔知食咩好，本來想試新舖頭，但諗諗吓都係是鬼彈食完閃返公司罷啦。燒肉我比多次機會你，試多你一次！食過兩次，一次好差一次好好。

切雞髀燒肉飯，附附碌碌今次高質好好味噃，終於都等到喇！豬皮卜卜脆而肉質軟棉，散發淡淡咸香，食得過！先黎脆皮下面藏著一層爽彈脂肪，脂肪下係甘香油脂，再向下係充滿肉汁軟軟半肥瘦，淋上淡豉油瞓係白飯之上，再添蔥油作點綴就即刻碌入口！百感交集，咸甜香彈滑脆棉腍軟硬，實在太感動喇！滿分超好味！

切雞髀好食都不得了！香甜味美，見到身材大好，皮光肉滑閃閃發光，薄薄雞皮蓋著微量滑滑雞油一跣入口，香甜到不得了，肉汁跟雞油混和潤澤每一顆味蕾。蔥油當綠色床單，白飯當棉皮，捲住嫩滑雞髀肉，用舌尖細味，頂級味道享受，無得彈！

燒鵝髀燒肉飯，簡直雙龍出海，天下無敵，正到啪啪聲呀！今日仲居然有燒鵝髀呢，可遇不可求，大吉！超重量級份量，食晒啲飯都剩返半碟餸啊！舊舊燒肉都係極上半肥瘦，皮脆肉嫩，咸香四射，滑滑棉棉又濕潤，肉汁像海潚般泛濫，大大舊肉、大大啖飯，thank god！

燒鵝髀香氣撲面而來，肥美得黎肉質纖幼，滑溜溜又充滿彈性，秘傳香料已滲入每吋肌膚，齒夾留香，拖一拖酸梅醬更醒胃醒神！皮香肉嫩，停唔到口！

油雞髀燒鵝飯，油雞髀嫩滑結實，雞皮非常彈牙而微爽。淡淡雞肉味混上雞油香，豉油又清甜，香而不濁，好味道。燒鵝香料入味，肉汁亦帶著濃郁香料味道。鵝肉味濃、鵝鴨香口不太油，又唔會過咸過肥，滿意。本想要求食鵝胸，但都係費事諸多要求喇，哈哈。蔥油我鍾意切到勁細粒架，依家個 size 太大粒啦，蔥汁味道唔夠出。撈上雞肉鵝肉蔥油，再加甜豉油同酸梅醬，味道多采多姿，正到痺！

燒肉燒鴨髀飯，燒肉睇落勁肥，成堆肥豬肉咁，賣相麻麻地。誰知一咬之下，好爽口好好味，肉味香甜有咸香外，仲沒點都不油膩，配上蔥油白飯，根本無可抗拒！只係皮唔脆的，而且有點韌，不過味道出眾，都滿意既。

燒鴨髀好肥喎，勁多皮下肥膏，要咬走掉左去，但勁香鴨油味囉。鴨肉好幼滑好香甜啊！香料早已佔據每條纖維。薄薄燒鴨皮香口味濃，連肉帶皮撈飯食真係好鬼好味，加少少酸梅醬錦上添花，真係一粒飯都無剩！仲唔夠飯食添呀，又剩返幾舊肉要淨食呢。不單止芥蘭爽嫩鮮甜，連椰菜都勁好味！多汁水嫩，點會咁架？

到底條芥蘭係咩血統架？邊度黎架？就算凍既都咁好食既？芥蘭勁爽甜，完全無渣又無半點澀味，葉同莖都非常鮮嫩，我直頭想叫一碟芥蘭食呀！金源到底係如何烚菜架呢？芥蘭真係好高質，完全無澀味、無草青味，質地幼嫩不粗糙，超甜超爽呢，好好味呀！大部份燒臘舖既伴菜都好差，我唔會食架囉。

黃瓜燒豬骨湯，今日個湯怪怪的，太甜喇，係咪落得太多蜜棗呀？好少可飲唔晒個例湯，飲左幾口放棄。

木瓜瘦肉湯，一向對甜湯無咩好感，用熟木瓜實在太甜接受唔到，青木瓜就無問題，所以今次飲兩啖就要講 bye bye。

合掌瓜湯好好味，肉味特濃，燒味店不愁沒肉沒骨頭餚湯啦，只需用頭頭尾尾已達至特濃肉湯喇，香濃甜美，合掌瓜清新，好味啊！