霞飛會館 (Moved) New Location

 今日第一次去食中環嘅「霞飛會館」，見到佢地個特價晚餐好似都幾抵食，就點咗呢個餐喇。呢個「紅燒一口翅」啲用料認真唔錯。唔會好似出邊一般中菜咁得一少撮，而且啲翅都算幾粗。味道就少少偏咸。之後呢味乾燒蝦球都算幾驚喜。蝦肉冇用太多粉去炸亦非常之爽脆！個汁同我所想嘅乾燒蝦球有啲唔同，佢地呢個汁少少辣加甜甜地，味道同蝦肉好夾，唔錯唔錯。之後係「鮑汁扣花膠」，其實餐牌有得揀花膠或者遼參，最後我揀咗花膠。件花膠都算幾大塊，口感都算幾好，但未算係入口即溶嘅感覺。反而個鮑汁真係好味。好香同鮑魚味濃郁！佢仲有少少白飯，用啲鮑汁黎送飯一流！最後仲有餐廳嘅招牌菜小籠包。做得招牌菜都知道唔簡單！只係用筷子夾起已經感覺到入邊嘅肉汁盪來盪去，點心皮夠薄但又唔會好易穿。第一啖真係要好小心，因為皮入邊真係好多湯汁同好熱，啲湯汁極之鮮甜！呢個小籠包都算係我食過嘅小籠包入邊數一數二了.其實仲有個頭盤嘅螺片不過影唔切相。成個餐$298 一個人再加一。又有翅又有花膠，以咁嘅用料同埋味道，價錢都算幾合理，喺中環都應該搵唔到幾多間了。