勝手 (Closed)

雖然今晚落住滂沱大雨，但係完全無阻我地去食慶生大餐既興致，一家四口，8 點鐘準時去到， 首先更係食呢度招牌串燒，雞泡魚乾-超惹味，厚燒牛舌-好爽口， 煙肉露荀勁juicy(我既至愛之一)，免治雞肉捧啖啖肉，岩曬我呢d食肉獸， 預先訂左兩條日本時令魚，大廚精心炮製了兩種色香味俱全既菜餚(值得俾個like大廚)，日式汁煮日本笠子-賣相已經好吸睛， 口感好特別，好有魚味，特式金䤼錭天婦羅-外脆內軟，粉漿厚薄適中，連出名嘴刁既老婆都話好好味，然後係壓軸登場既A5和牛shabushabu,老闆娘叫我先飲一下魚湯，好鮮味，好足料，跟住係大大片既A5和牛，入口即溶，牛味十足，真係好正，食左咁多肉，梗要食返個雜錦菜盤中和下先， 最後仲有甜品-抹茶紅豆布甸，抹茶同紅豆味好夾，食完之後真係好滿足。