順發粉麵

Open Now

Now Closed

政府啱啱宣佈暫停晚市堂食14日，搞到放假連出街嘅意欲都冇乜，瞓到黃朝百晏先起身，所以都係屋企附近食嘢就算啦！今次介紹呢間粉麵店由我細細個就已經出現，係近期搬咗舖位，所以裝修風格都比較新。裏邊售賣嘅粉面都係比較傳統港式風味嘅，另外仲有柴魚花生粥煎腸粉同埋一啲傳統嘅快餐例如雜扒飯蒸魚飯等等。對上一次食已經有一段時間，所以我今次叫咗一碗雲吞叉燒河粉食返懷舊嘅感覺。我記得細細個嗰陣見到餐廳嘅職員坐喺舖頭包雲吞，今次食到嘅味道同細個食到嘅一樣，每一粒雲吞都好大粒之餘，亦都可以清楚見到佢哋裏面嘅豬肉餡了同埋蝦仁都幾抵食㗎。另外叉燒就不過不失啦，唔會話好乾，不過最重要係佢哋嘅河粉，佢哋嘅河粉晶凝通透而且好滑嫩，如果冇記錯嘅話，我記得係來自香港仔嘅本地品牌有記粉麵廠架，呢一類型嘅街坊式粉麵店喺現時已經買少見少，大家如果經過嘅話不妨可以試吓啦！