雲長小龍坎老火鍋 (Closed)

今日同兩個朋友去打邊爐，平時我都少食辣，今次朋友就帶我嚟到呢間試下正宗成都麻辣火鍋，一入到去見到裝修都好花心機，滿滿嘅中國特色：關公，龍，字畫等，睇到出有心機做到似返當地嘅特色我哋三個人叫咗個鴛鴦鍋，有辣有唔辣(我哋怕正宗成都火鍋太辣食唔到)，店員就教我地整"油碟"，用來解辣之用，入來已經見到窗口擺滿一罐罐，原來就係小龍坎用來整油碟嘅專用麻油，加埋其他配料混合非常之香，用來配合麻辣火鍋一流!叫咗幾款招牌菜式，龍廚八寶摩天輪有八款不同嘅手打丸同餃子，啱哂想試新嘢嘅我，賣相似足一個摩天輪，睇得又食得，呢度嘅手打丸款式多之餘，質素都好高，彈牙之餘用料都好足，推薦！另一款招牌極品手切肥牛，油花均勻，厚薄適中，牛味濃郁，配合麻辣湯底同油碟，非常香口。仲叫咗醉雞，同樣出色，花雕酒味花，雞肉嫩滑，但與麻辣湯底配合度一般。對於平常唔太食辣嘅我，呢度嘅有多重嘅層次，香 麻 辣配合得宜，值得一試。呢度環境都適合一班朋友來傾計聚舊，裝修特別可以打下卡。