越一越南牛肉粉專門店 (Closed)

粉嶺一日遊，中午的午餐揀了在粉嶺中心食，一出火車站行過第二個商場就到了，餐廳在地下，唔熟路其實都幾難搵㗎，好彩今日同一位地膽來，轉個彎就到。午餐set大約五十蚊左右，有一杯餐飲送，可以加錢轉特飲。自己揀左要海南雞飯，無特別問所以跟左白飯，無油飯咁香，但白飯健康啲呀，海南雞夠滑，已去骨，皮下脂肪亦不多，點埋醬汁勁正，個人較貪心加重口味，點齊薑蒜豉油好味呀。朋友個香辣肉碎煎蛋飯幾靚仔，隻蛋黃超正，最鍾意蛋汁撈飯，肉碎香口微辣，又係好好撈飯。飲品轉左三色冰同鹹檸疏打，冰涼透心，夏天飲超勁舒服。