YKK建榮

Open Now

Now Closed

今年嘅天氣唔算好凍，新年前都只係10幾度左右，但係香港人鍾意打邊爐就冇分春夏秋冬啦。咁岩今日有朋友嚟探我，我就梗係帶佢去呢間平靚正又新鮮嘅大排檔打邊爐啦，而家香港呢種大排檔邊路，就真係買少見少啦。適逢食飯時間，都有九成滿座，大排檔好有平民嘅氣氛。首先我哋叫咗個醉雞煲，個湯底一上枱，就已經聞到香香濃濃嘅藥材味。之後新鮮嘅雞上場啦，份量好大碟，隻雞好大隻，放落個煲度滾幾滾就食得，雞肉吸收左湯底嘅精華夠晒惹味，雞肉鮮嫩，完全食唔出有雪藏嘅味道，而且皮脆肉滑，充滿花叫嘅香氣，食落口有一種久違嘅味道。脆肉鯇，夠晒新鮮，放落個湯度滾幾滾，入口爽口彈牙，呢種魚真係唔係人人識食，但本身自己就好鍾意啦，因為爽脆，又唔多骨，啱晒我呢種唔鍾意食多骨魚嘅人。紫菜響鈴，呢個響鈴真係不可不吃，因為係廚房新鮮炸起，而且中間仲夾住紫菜，入口鬆化，又可以放落個湯度吸收湯裏面嘅精華再放入口，另有一番滋味。新鮮鵝腸，夠晒大碟，放落個湯度幾秒就可以食得，入口爽脆，又唔會好多肥膏，真係就算要減肥都要食埋今次先。