河畔強記雞粥海鮮酒家 (Closed)

今午諗今晚去邊同女友食飯,呢個網頁睇完,知道呢間抵食,所以決定今晚同女友到。今晚九點去將軍澳接女友收工,經大老山隧道去到沙田,到沙田新城市廣場泊低車,因女友話好耐未行過呢頭,所以我特登陪佢行一個鐘。至九點半多車,我因對沙田並唔熟悉,所以沿途向的士司機大佬詢問,幾經波折我先搵到【河畔花園】,入面停車場全部泊滿,我見沿路上好多違例泊車,我就鼓起勇氣就咁泊街。同女友一齊進入【強記雞粥】,點(一蚊窩鮑魚雞粥、$18元豉椒炒蜆、$18元楊洲炒飯、$18元沙薑雞及正價蒜茸炒白菜仔)。大致上味道真係唔錯,鮑魚雞粥內鮑魚幾正,粥底亦好鮮味唔多味精。豉椒炒蜆味道亦好,但太多沙及數量較少。楊洲炒飯除唔多夠乾身外,其實都甚好味。沙薑雞好滑亦新鮮,又係抵食之作。蒜茸炒白菜仔有酒樓水準,大大碟果然係正價。我同女友兩個人,竟然可以全部食哂,真係自己都估唔到。至十一點半多埋單離去,埋單連茶水、花生及加一等,總共要一佰三十幾,雖然計計去都唔知點解,比心目中條數多好多,但食得滋味、招呼及服務態度唔錯,我個人都覺得幾值得,下次我會再車,載同親朋戚友再幫襯。