松坂庫 (Closed)

一直都係好鐘意食手卷嘅人，個人唔會當正餐咁食，主要係好多時正餐唔夠飽，然後去補飛嘅。是夜同朋友打完邊爐，實在唔係太夠，所以回家途中，行經松坂庫，決定食多條手卷先番歸，以免夜媽媽先嗌肚餓。手卷款式都幾多，左拼右拼都有超過30款，基本上想要嘅款式都有，價錢由10蚊至45蚊不等，視乎款式。最平嘅係螺肉手卷($10)，比較貴價嘅有蟹膏、半版海膽、拖羅、和牛海膽、鵝肝等，都係45蚊，而我見到有優惠就話惠顧飲品，可以以35蚊換購呢啲貴價款，價錢都算幾大眾化。客人要先去收銀處落單，然後等師傅握好手卷，店內有幾張高枱可供即時食用，客人亦可外帶。因為只係兩條手卷，同買左一盒壽司，唔會花好多時間，我地就即時食埋先走。火炙蟹籽帆立貝 $25：帆立貝有兩大粒，加左少少燒汁，幾好食，入口爽，幾新鮮架。而且火炙過味道更香。面頭有少量蟹籽，口感更豐富。只係我之前食過同款手卷，雖然面頭係帆立貝，但因為蟹籽份量都平均卷起入面，所以食到尾都會有少量蟹籽，不至於太單調。不過今次呢條大概食到一半，就冇哂料嚕。