川味雞烤魚大王 (隆亨商場) (Closed)

雖然呢度出名雞煲同烤魚，但想快快食完返屋企，任性地揀左普通打邊爐，啲料又幾靚喎。蕃茄薯仔湯超濃，材料簡單，但因為有大量蕃茄，滾起比屋企煲更加濃蕃茄味。 必點響鈴索哂啲汁，味道清新感覺上冇咁邪惡。手切特級安格斯肥牛真材實料，厚切肉味濃，軟綿綿夠哂肥。 打邊爐最緊要就係碟牛，叫最靚呢款真係冇失望。粟米餃拼韭菜餃係自家製味道，菜肉比例岩岩好，肉餡清甜彈牙，滾耐左都唔會爛。墨魚滑拼蝦滑比想像中細，不過好夠鮮，食到粒粒蝦肉同墨魚，質感幼滑彈牙。厚切午餐肉真係終極厚切，應該真係成罐上，入哂味啖啖肉真係好爽。紅油豬耳好大碟，爽脆夠辣，食極都仲有，底下仲有木耳同拍青瓜，好抵食。