Video
Read full review
2016-05-23
596 views
老婆上堂，知道今晚得番一支公食飯，所以，就趁機約埋保險經紀傾嘢，又一次過搞埋其他私事，待完晒之後就搵間餐廳舒舒服服食番餐。因為完晒事時身處尖東，順便到半島中心拍卡慳兩雞，出嚟見到對面好似有間新開嘅台灣麵店「鐵牛」，望入去都幾人氣 ，喺值搏嘅指標。雖然佈局屬「大眾食堂」格，全部都喺自由席，但一入門口都會有侍應招呼及安排入座，而且，裝修倒喺幾骨子。一張點菜紙就睇晒有咩選擇，台灣湯麵、便當、特色乾拌麵、鮮蕃茄麵、台式麻辣湯麵 、小吃、小菜、台式特飲、汽水、啤酒……等等一應俱全 。雖然另備有印刷精緻嘅餐牌，不過，無太多菜式嘅相片佢參考，覺得未有好好利用嚟吸引客人嘅眼球。而依度點餐有啲特別，晌點菜紙剔好食物後，要到門口櫃位俾錢，之後，就由侍應將食物逐一送上，每送上一樣嘢都會劃一劃單，直至送好晒所有食物佢哋就會收走張單，以表示依枱客無欠未出嘅食物，個管理系統又幾好喎 。食完又唔晒嗌埋單，即閃走人！ 黃金梅子脆薯 $32 晌台中食過一次，新鮮即炸嘅蕃薯，灑上金梅粉，超正。今次再遇，即成為心水必叫嘅小食，蕃薯炸得金黃，入口粉香唔油，不過，熱度差少少，但灑上大量金梅粉，酸酸甜甜，一樣覺得好
雖然佈局屬「大眾食堂」格，全部都喺自由席，但一入門口都會有侍應招呼及安排入座，而且，裝修倒喺幾骨子。
一張點菜紙就睇晒有咩選擇，台灣湯麵、便當、特色乾拌麵、鮮蕃茄麵、台式麻辣湯麵 、小吃、小菜、台式特飲、汽水、啤酒……等等一應俱全 。雖然另備有印刷精緻嘅餐牌，不過，無太多菜式嘅相片佢參考，覺得未有好好利用嚟吸引客人嘅眼球。
而依度點餐有啲特別，晌點菜紙剔好食物後，要到門口櫃位俾錢，之後，就由侍應將食物逐一送上，每送上一樣嘢都會劃一劃單，直至送好晒所有食物佢哋就會收走張單，以表示依枱客無欠未出嘅食物，個管理系統又幾好喎 。食完又唔晒嗌埋單，即閃走人！
黃金梅子脆薯 $32 晌台中食過一次，新鮮即炸嘅蕃薯，灑上金梅粉，超正。今次再遇，即成為心水必叫嘅小食，蕃薯炸得金黃，入口粉香唔油，不過，熱度差少少，但灑上大量金梅粉，酸酸甜甜，一樣覺得好食。
黃金梅子脆薯
$32
46 views
1 likes
0 comments
主廚私房牛肉乾拌麵 $73 台灣啲紅燒牛肉麵一向好正，所以，最初喺打算叫紅燒牛肉湯麵。不過，再睇睇吓餐牌，見到有一系列特色乾拌麵，好似未試過，故最終點咗一客主廚私房牛肉乾拌麵。
「主廚私房牛肉」言下之意就包咗大塊金錢展、秘製牛腩及香滑牛筋，佐料有大量蔥花及青瓜絲，撈勻啲麵條時原來青瓜絲下仲有酸菜，將所有材料攪勻之後，麵條柔韌之餘，味道帶點酸爽 ，再者，麵條嘅份量實在唔嘢少；而金錢展、牛腩及牛筋都做得好食，尤其牛腩滷得鬆化，牛筋軟腍有咬口 。
隨乾拌麵附帶嘅牛骨湯，味道非常香濃，啖啖精華 。
焦糖珍珠奶茶 +$15 珍珠奶茶固然喺台灣名物，焦糖珍珠奶茶原價要$30，不過，凡點湯麵、便當、乾拌麵、蕃茄麵、麻辣湯麵就可以+$8配熱飲、+$10配凍飲、+$15配特飲，有優惠當然詳用。大大杯珍珠奶茶茶底夠香，入口幼滑，帶微微焦糖香，啲珍珠好軟彈 。
反轉張點菜紙，後面印有午市套餐（$45-$58），附3種配菜及熱飲，可惜只限星期一至五（11:30-14:30）供應，星期六、日、公眾假暫停，應該無福消受。
鐵牛，何止鐵一般嘅熱血，做食物，似乎亦有鐵一般嘅熱誠。有機會，下次再試試佢哋啲紅燒牛肉湯麵，睇睇似唔似嗰時我晌高雄嘅老宋所食到咁正先！
Post
