金牌小龍 (Closed)

Isquare裹面，有好多餐廳，有邊間你覺得性價比超高呢？沿用咗台灣式嘅點菜模式，一張簡單嘅紙，包括晒所有嘅食物同價錢，方便選擇。今次叫咗麻辣金錢肚、薑汁炒芥蘭、紅燒牛三寶面、金牌小籠包同埋豉汁蒸黃花魚。麻辣金錢肚非常入味，份量適中，當中有辣椒絲，薑絲同芫荽做伴碟同調味，唔錯。薑汁炒芥蘭芥蘭非常新鮮，食咗一條即刻忍唔住夾第二條黎食。色水亦都唔錯，係翠綠色嘅。芥蘭硬度適中，所以口感不俗。紅燒牛三寶麵依個麵令我留下幾深刻印象，三寶包括牛肉牛筋牛肚。先唔講佢哋嘅牛筋牛肉炆到幾淋幾好味，淨係講個湯底已經值回票價。$52食到個湯底呢個份量呢個質素，仲要係尖沙咀。個麵亦係一般台灣牛肉麵底，正。金牌小籠包$38有5個小籠包，物超所值，係一定要叫嘅食物。豉汁蒸黃花魚豉汁味濃郁，黃花魚既肉都好滑，感覺依道蒸魚係家常便飯，媽咪用心煮嘅好味道。總結：性價比非常高，尤其係小籠包同埋紅燒牛肉三寶麵，下次再嚟一定會再嗌。