生記滷味

Open Now

Now Closed

身為潮州人，近呢大半年先開始鍾意食潮州嘢。上、西環一帶潮州菜館林立，有不少都係頗有水準嘅，可能係呢區係舊區，比較多潮州人聚居嘅緣故。是晚我同阿K由佢屋企行到去正街附近，專誠試吓呢度嘅獅頭鵝。呢間舖頭好細，主要係賣外賣，入到去，客人絡繹不絕，牆壁仲貼咗曾特首到此一遊嘅相，証明呢度啲嘢响該區有啲口碑。獅頭鵝同普通鵝最大嘅分別就係獅頭鵝比普通鵝大隻好多，而且個頭頂好似生咗粒好大嘅瘤咁。我問老闆食鵝片用邊個位最好食，佢就話什麼上部啖啖肉，下部有口感。由於我地聽唔明佢嘅口音，所以由佢話事，叫咗五十蚊鵝片同鵝腎。肉比較鞋口，雖然不時，但都可算肥，而且一食就食出鵝味，獅頭鵝果然有啲唔同。鵝腎就相當之爽，配上醋料，佐酒一流，如果係醉腎嘅話就更加perfect.埋單六十蚊，幾經濟實惠。原來呢度碟頭飯都只係廿蚊，仲要連例湯，真係抵。