Lockeroom Dining (朗晴坊) (Closed)

下午茶時段嚟到 Lockeroom Dining，食物比 lunch 時段平十蚊，兼且平日唔使加一，幾抵食。先嚟個餐湯，就咁睇似好稀嘅雜菜湯，未飲之前不寄厚望，一啖入口，隨即發現有驚喜：蕃茄味比想像中濃，底下嘅薯仔味都突出，唔錯。至於個蒜香牛油法包都好正，不但厚切，面頭鋪上牛油同蒜蓉之餘仲烘得微燶，食落好滋味😋。主菜黑松露蘑菇海鮮炒飯最出色係個飯底，炒得粒粒分明之餘，竟然仲有少許飯焦，勁有咬口，真心好食👍；配料方面， 菇類同三色椒都比海鮮多，不過由於黑松露味香濃嘅飯底實在太吸引，海鮮少啲都冇關係啦🤓。另一個主菜香辣蒜片羅勒意大利扁麵則同想像有啲落差：首先佢勁少辣，反而偏甜😂；其次，我完全食唔出羅勒味，蒜味亦都非常輕微。由於成個意粉有唔少三色椒同洋蔥，味道於是被呢啲配料主導咗，不過又唔代表佢唔好食嘅，我會評價為味道正常啦。