御名軒

Open Now

Now Closed

我好鍾意食中餐，尤其係去街坊嘅酒樓，貪佢哋食物好味又唔會太貴，今晚有一個飯局，原本諗極都諗唔到去邊度食，橫掂今晚要返中環訓，為咗方便搭車決定就係天后開餐，諗返起上次嚟過呢度食龍蝦伊面，所以就膽粗粗提議朋友仔嚟呢度食，一出地鐵站就到勁方便所以佢哋都唔反對。叫咗兩個冷盤前菜，五香牛展片同埋海蜇拼燻蹄，平時好恨食呢啲但係媽媽唔俾叫，今日同朋友食飯就可以叫自己鍾意食嘅嘢，五香牛展片個醬汁味道帶甜，夠冰凍，肉質好林，好開胃！估唔到佢細細碟但係有好多片，好耐都冇食燻蹄，豬皮同jelly嗰部份夠爽口，唔會肥淋淋，佢連肉個部分都做到冰凍爽口，加埋醋汁食勁正！天時暑熱最好就係食冬瓜盅，冬瓜湯夠清甜，冬瓜肉夠嫩唔會起喳，有好多配料喺裏面，有新鮮帶子肉，蝦瘦肉冬菇草菇蓮子蟹柳，你唔好睇佢個冬瓜盅細細個，唔知點解北極都有，我哋每個人起碼飲咗三四個碗，仲剩返好多冬瓜肉！另外好開心食咗賽螃蟹，佢同其他酒樓做法有啲唔一樣，佢落咗好多料入去同個蛋白一齊炒，邊有人好似佢哋咁誇張落咁多隻蝦，炒得好滑，唔會油淋淋，仲有幾大舊西蘭花，其實我食完個賽螃蟹已經飽左！佢個吊燒雞都好好食，皮脆肉嫩，最鍾意佢隻雞唔肥，食落果皮脆落落！