燒烤堂

Open Now

Now Closed

荃灣新開人氣分店，主打多款串燒風味，為配合客人不同口味同喜好，呢度集合咗港、川、日、泰、韓、西、馬、新疆菜式，有辣有唔辣，老少咸宜，十分貼心。依家仲做緊買一送一日本生啤優惠，同朋友仔你一杯我一杯就啱喇～ 肉類選擇眾多，豬牛雞海鮮樣樣要少少，印象深刻嘅包括鹽燒原塊雞皮，炸至薄身又酥脆、豚肉卷，油脂感滿滿，包住唔同配料，推牛油果同荔枝，食落幾解膩、香蒜咸蛋黃燒墨魚滑，口感彈牙，調味適中、盟燒紅祈魚，魚香味足。前菜、得意作同穀物無論係賣相同味道都比想像中出色，桂花蜜糖本地番茄又大又甜、焦糖鰻魚芝士玉子燒層次豐富、明太子燒厚揚豆腐帶點口感、香草蒜蓉包同甜奶牛油包亦係飽肚加邪惡之選，前者鹹香，後者甜又軟身，性價比高。野菜要咗牛油蒜蓉焗雜菇同孜然燒蒜蓉茄子，份量多，調味足，可以叫。甜點有蜜糖燒菠蘿，超甜超多汁，每人起碼食到兩串、糖不甩燒芝麻湯丸Q彈煙韌、柑桔咸蛋黃卷外脆內餡飽滿，三款都值得一試。