盈福28 (Closed)

自從搬離開馬鞍山後已經好少返去，早兩日一返到新港城，成個商場大變，變到我都差啲認唔到路，仲多咗好多新食肆，最後揀咗盈福28，因為貪佢而家做緊8折。坐低睇吓Menu，啲餸個樣望落都幾精緻，不過最吸睛係38蚊一隻乳鴿，三條友食，決定來一雙。上菜之前，侍應畀埋手套我哋，好細心。隻鴿唔算細，味道都幾好，性價比幾高，差唔多枱枱都有叫。另外仲叫咗皮蛋豆腐、松子魚、黑醋雞花同龍鬚芥蘭。個皮蛋豆腐有驚喜，個醬同出面一般嘅麻醬唔同，佢加咗少少芫荽吊味，芫荽味唔算太濃烈，但成個感覺清新咗。黑醋雞花單骨上，經炸過後外皮帶酥脆，肉質亦夠嫩，個黑醋醬唔嗆喉，味道算平衡得幾好。佢有兩大條菠蘿伴碟都食得，不過略嫌燒得唔夠火喉，有啲酸。松子魚好大條，四、五個人食都好夠，個龍鬚芥蘭亦炒得爽脆夠鑊氣。呢餐8折後平均每人百𡃁蚊，以呢個價錢、呢個質素，值得返兜。