金沙角大牌檔 (Moved) New Location

踩完車終點係大圍，搭了兩個馬鐵站落o黎食，可能大家都去了長洲搶包山關係，竟然冇乜人，換轉一般的星期六、日，都幾難虛。因為除了我之外，仲有兩位老友都鍾意食生炒骨，避免大家爭食，索性生炒肉、咕嚕肉各一碟，最後兩碟都沒有分別，因為每碟裡面有骨亦有肉，可能分開落單情況會好D。大排檔當然夠鑊氣，所以兩碟都做得算有水準，可惜食到最後時，有幾舊骨(肉)有少許油"益"味。煎蠔餅-這個比尚興好好多，起碼唔會濕、唔會腍，是脆脆的，唯一唔好就是蠔仔唔多。墨魚脆脆波-外層脆、中間爽口彈牙，而第三層有略溶的芝士，一啖咬下去感覺幾得意，芝士味幾濃，除了已過了墨魚味外，食了一整粒後都好溜。薑蔥魚云煲-雖然用薑蔥整法，決少了薑蔥的香味，但勝在熱辣辣。雞、羊串燒各半打-終於搵到間燒得好食的雞肉，雖然係急凍肉雞，最起碼唔會燒得乾"爭爭"，好似食雞肉乾。羊肉串有羊羶味，不過咬落好腍，感覺怪怪得。蒜蓉炒莧菜-有一段酒樓炒菜的問題，就是多油。6個人加埋啤酒、汽水都係$310，真係抵。食飯時我老友見到有兩三隻「鼠輩」橫行，其實係大排檔食飯都預o左。