禮記自助蒸氣鍋 (Closed)

是晚星期五係九龍灣睇完戲後，即興想食火鍋，男友帶我由MCL行左十分鐘左右，黎到工廠區嘅禮記自助蒸氣鍋。睇招牌「禮記」原來日間做工廠食堂，夜間做打邊爐同蒸氣鍋。上幾級樓梯見門口一堆人等緊，以為要排好耐，不過原來人地係等入座，唔夠十分鐘我地就有得坐。入內見店面都好大，擺左十幾張圓枱，自助bar款式都好多，亦尚算衛生，牛、豬、魚、菜、菇類、丸類、飲品等，火鍋應有嘅食物算齊全，仲可以自己調較醬汁。我地係卡位坐下來，侍應就端上兩碟海鮮，份量按人數分配，一碟有4隻蝦同8粒蜆，另一碟就半條魚，呢個份量對我地黎講好足夠，唔夠可以加錢叫，枱上墊紙好貼心，列出所有食物要蒸嘅時間，唔怕蒸得唔夠熟，隨後係自助bar掃食物，食得好滿足，加上食火鍋必不可缺嘅肥牛係幾好食，以百零蚊黎講，係好抵食，絕對推介!!!至於食物新唔新鮮，我認為係咁，平時打邊爐食物如果唔夠新鮮，仲可以由湯底打救，但蒸氣鍋就純粹蒸出食物嘅味道，唔新鮮一食就食得出，而我地食左兩小時，都一致覺得食物係夠新鮮，起碼無異味，又係個句，以百零蚊黎講，係好抵食，絕對推介!!!