一燒窰 (Closed)

呢日約佐朋友去食飯，其中一個朋友想食日本菜，我又唔想連續幾日食生冷野，最佳解決辦法就係去居酒屋，一次過滿足兩個願望！一燒窰喺通菜街，如果唔係朋友介紹真係未必識黎！明太子玉子燒（$45）玉子燒顏色較淺，但蛋味十足，層層玉子好有層次，加上明太子醬，增添咸香。四式燒蠔（$65）如果鍾意食蠔就唔好錯過啦，有齊4款，包括：黑松露、蒜蓉、芝士以及餐廳秘製醬汁。我試佐黑松露燒蠔，蠔身肥美飽滿，黑松露落得非常慷慨，香氣撲鼻！松露薯條（$36）平時岀街我好少點薯條，但呢晚放工大家都好想食d邪惡野減下壓，好彩有試到咋！醬汁好有誠意，mayo sauce本身已經有松露，上面仲放多佐一堆松露，食嘅時候再蘸多少少，真係超香松露味！加上薯條炸得香脆，完全食唔停口。牛六笠($40)究竟牛六笠係牛嘅其中一個部位，定係取諧音「牛肉粒」呢？牛六笠以粒狀去燒，咬落略有韌度，嚼嘅時候反而嚼岀肉味，不過調味就略嫌偏鹹，如果調整一下會比較好。鰻魚飯定食（$108）超級抵食！原條鰻魚舖喺飯團上，霸氣十足。其實呢個價錢包前菜同麵䜴湯已經冇挑剔嘅地方，鰻魚大條又厚身，加上甜甜嘅燒汁，必點！呢度食物質素高，價錢平，CP值好高！！